دو شعر ترکی از استاد قابل نژاد سردرودی

 

 

هامینین لبلری خندان اولسون

 Hamının ləbləri xəndan olsun

انسان اول کس دی کی جسمی نور اولوب جان اولسون

معرفت کسب ائیله ییب وارد عرفان اولسون

İnsan ol kəsdi ki cismi nur olub can olsun

Mə`rifət kəsb eyləyib varede orfan olsun

هامی جانی اولانین دردينی، اؤز دردی بیلیب

گؤره بیر ايش، هامینین دردينه درمان اولسون

Hami canı olanın dərdini , öz dərdi bilib

Görə bir iş , hamının dərdinə dərman olsun

نه قدر عالم خاکه ياپیشیب قالمالیسان

 حیفدير روح قفسلرده پريشان اولسون

Nəqədər aləme xakə yapışıb qalmalısan

Heyfdir ruh qəfəslərdə pərişan olsun

 برك يئری بلله ، آريت داش- تیکانین، گول توخومون

 سپ، سو وئر، قوی گؤيريب، گوللو گولوستان اولسون

Bərk yeri bəllə , arıt daş-tikanın , gül toxumun

Səp su ver , qoy göyərib , güllu gülüstan olsun

نه قَدَر ائیلییَه بیلسَن ، بیرنی بند دن آچ

قويما دنیا بیرينه غمکده، زندان اولسون

Nəqədər eyləyə bilsən , birini bənd dən aç

Qoyma dünya birinə ğəmkədə , zindan olsun

 صورت خاکی همان جهلدی، ظلمات و جماد

جسمی دؤندر جانا، تا لايق جانان اولسون

Surəte xaki həman cəhl di , zülmato cəmad

Cismi döndər cana , ta layiqe canan olsun

 اوُرَیین سیْخما ، حالیْن پوزما ، بیرین ائتمَه بئکئف

راضی اول تا هامینین لبلری خندان اولسون

Ürəyin sıxma , halın pozma , birin etmə bekef

Razi ol ta hamının ləbləri xəndan olsun

دنیادا اصل بودور، جان دئسه کیم، جان ائشیدر

خوش دانیْش ؟ دونیا سنه روضه ی رضوان اولسون

Dünyada əsl budur , can desə kim , can eşidər

Xoş danış , dünya sənə rozeye rizvan olsun

سنده پاکیزه ائله اؤز سینه وی قابل نژاد

رنگ برنگ قوی اوُره ییندَه گوُل و ریحان اولسون

 Səndə pakizə elə öz sinəvi Qabilnejad

Rəng bə rəng qoy ürəyində gülo reyhan olsun

 

 

 

 

 

هامی انسان اولاجاقدیر

Hami insan olacaqdır

دنیا بو ياخینلیقدا گولوستان اولاجاقدير

 ايشلر دوزلیب، سختیلر آسان اولاجاقدير

Dünya bu yaxınlıqda gülüstan olacaqdır

Işlər düzəlib , səxtilər asan olacaqdır

دعوا یئرینی صوُلح و صَفایه وئره جکدیر

ظوُلم و ستمین دوره سی پایان اولاجاقدیر

Də`va yerini sülho səfayə verəcək dir

Zülmo sitəmin dövrəsi payan olacaqdır

بخل و حسدی پاک ائده جک هامی اورکدن

اینصاف ائله ییب تابع وجدان اولاجاقدیر

Boxlo həsadi pak edəcək hami ürəkdən

İnsaf eləyib tabe`e vicdan olacaqdır

يئتمیش ايکی دين بیر اولاجاق دنیا بويوندا

هامی بیر اولوب، رهرو عرفان اولاجاقدير

Yetmiş iki din bir olacaq dünya boyunda

Hami bir olub , rəhrove orfan olacaqdır

تبعیض و تعصب يئرين ايثار آلاجاقدير

نه مذهب و قانون ، نه ده ديوان اولاجاقدير

 Təb`izo tə`əssob yerin isar alacaqdır

Nə məzhəbo qanun , nədə divan olacaqdır

نه من- سن و نه آغ- قارا،  نه کافر و مؤمن

 بیر ائو کیمی، نه روم نه ايران اولاجاقدير

Nə mən – sən və nə ağ–qara , nə kafər olacaqdır

Bir ev kimi , nə Rum nə İran olacaqdır

 نه مرز اولاجاقدير، نه بؤلوم شرقیله غربه

دنیا باشا باش روضه ی رضوان اولاجاقدير

 Nə mərz olacaqdır , nə bölüm şərqilə ğərbə

Dünya ba.abaş rozeye rizvan olacaqdır

دای اولماياجاقدير بیری دمده، مینی غمده

ظلمت قوتولوب، نور نمايان اولاجاقدير

Day olmayacaqdır biri dəmdə , mini ğəmdə

Zülmat qurtulub , nur nimayan olacaqdır

بو دوز اولا بیلمز، بیری يئسین، يوزو باخسین

 نعمت هامییا سهل و فراوان اولاجاقدير

Bu düz olabilməz , biri yesin yüzü baxsın

Ne`mət hamıya səhlo faravan olacaqdır

قابل نژادين سؤزلرينی غربته سالما

او گون اولاجاق کی هامی انسان اولاجاقدير

Qabelnejadın sözlarini ğurbətə salma

O gün olacaqdır ki hami insan olacaqdır